Mae Pearson UK a'i bartneriaid, OUCEA ym Mhrifysgol Rhydychen ac UCL, wedi cael eu comisiynu i gynnal astudiaeth PISA 2025 yng Nghymru, Lloegr a Gogledd Iwerddon ar ran eu llywodraethau. Rydym yn cymryd diogelwch data o ddifrif ac yn dilyn Deddf Diogelu Data 2018 a'r Rheoliad Cyffredinol ar Ddiogelu Data (GDPR). Caiff unrhyw wybodaeth bersonol y byddwn yn ei chasglu ei chadw'n ddiogel ac ni fydd modd adnabod unrhyw ddisgyblion nac ysgolion unigol mewn unrhyw adroddiad na chyhoeddiad. Dim ond cyhyd ag y bydd eu hangen i gynnal gwaith dadansoddi ac adrodd mewn perthynas â'r astudiaeth y bydd y Ganolfan Genedlaethol (Pearson, OUCEA ac UCL) yn cadw data PISA ac, ar ôl hynny, bydd yn dileu'r data o'i systemau.
Diben yr astudiaeth yw cynhyrchu ystadegau ar ddysgu a datblygiad disgyblion, er mwyn dysgu mwy am y ffordd orau o helpu disgyblion i feistroli pynciau allweddol. Byddwn yn casglu gwybodaeth am yr hyn y mae disgyblion wedi'i ddysgu o'u hatebion i gwestiynau asesiad PISA. Byddwn hefyd yn holi disgyblion am eu hagweddau a'u cymhellion er mwyn ceisio deall sut mae'r rhain yn cyfrannu at berfformiad disgyblion. Os bydd modd adnabod disgyblion neu eu hysgol yn y data sy'n deillio o'r astudiaeth, caiff y manylion hynny eu dileu a defnyddir cod yn eu lle, a chaiff yr holl ddata o'r astudiaeth eu cyfuno ag ymatebion gan ddisgyblion ac ysgolion eraill sy'n cymryd rhan yn genedlaethol a'u cymharu â chanlyniadau disgyblion ledled y byd. Os bydd unrhyw gwestiynau na fydd disgyblion am eu hateb, gallant eu gadael yn wag.

Gweld enghreifftiau o'r math o gwestiynau a gaiff eu cynnwys yn astudiaeth PISA